Þarf að auka atvinnu með öllum tiltækum ráðum

Frjálslyndi flokkurinn vill að ráðning hæstaréttardómara verði samþykkt á Alþingi með auknum meirihluta, sagði Guðjón Arnar Kristjánsson, formaður Frjálslynda flokksins við umræður um stefnuræðu forsætisráðherra á þingi nú undir kvöld. Guðjón sagðist sérstakelga vilja að skýrt yrði markað í stjórnarskrá að auðlindir séu þjóðareign og ríkið hafi aðeins heimild til þess að ráðstafa tímabundnum nýtingar- og leigurétti. Stjórnlagaþing hafi ærin verkefni.

Þá sagði Guðjón að hvalveiðar hefðu verið leyfðar til næstu fimm ára. Sú ákvörðun hefði staðið lengi í Einari K. Guðfinnssyni. Að lokum hafi hann þó fengið kjarkinn þegar starfi hans sem sjávarútvegsráðherra var að ljúka. Frjálslyndi flokkurinn hafi alla tíð haft það á stefnuskrá sinni að hér yrðu stundaðar hvalveiðar í sátt við eðlilega nýtingu náttúrunnar. „Því verður ekki trúað að óreyndu að Steingrímur J. Sigfússon sjávarútvegsráðherra muni draga til baka ákvörðun um stórauknar hvalveiðar í atvinnuskyni hér við land," sagði Guðjón.

Hann sagði að Íslendingar þyrftu að auka atvinnu í landinu með öllum tiltækum ráðum og vinna af alefli gegn vaxandi atvinnuleysi. Hvalveiðar falli vel að þeim áherslum sem nú verði að vera forgangsmál.