Launagreiðslur jukust margfalt miðað við starfsmannafjölda

Heildarlaunagreiðslur Landsbanka, Glitnis og Kaupþings og forvera þeirra frá árinu 2002 og fram til falls þeirra síðastliði haust jukust margfalt miðað við starfsmannafjölda. Mest var hækkunin hjá Landsbankanum. Þetta kemur fram í svari Björgvin G. Sigurðssonar, fyrrverandi viðskiptaráðherra, við fyrirspurn Jóns Magnússonar, þingflokksformanns Frjálslynda flokksins, sem dreift var á Alþingi í dag.

Samtals störfuðu 2572 starfsmenn hjá bönkunum þremur árið 2002 og fjölgaði þeim um helming á fimm árum. Á sama tímabili jókst launakostnaður bankanna úr 12,7 milljörðum króna í 47,3 milljarða eða rúmlega 370%.

Landsbankinn

Launakostnaður Landsbankans fimmfaldaðist á tímabilinu 2002 til 2007 og fór úr 4 milljörðum í 20,3 milljarð króna. Hækkunin er rúmlega 500%. Á sama tíma fjölgaði starfsmönnum bankans um 56%.

Glitnir

Hjá Glitni jókst launakostnaður úr 4,1 milljarði króna árið 2002 í 15,5 milljarða fimm árum síðar eða 380%. Á tímabilinu fjölgaði starfsmönnum bankans um 65%.

Kaupþing

Launakostnaður Kaupþings var 4,6 milljarðar króna 2002 en 11,4 milljarðar árið 2007. Aukningin nemur 250%. Heildarfjöldi starfsmanna Kaupþings árið 2007 var 1129 og hafði þeim þá fjölgað um 27% á fimm árum.