Þorskarnir svo stórir að vélarnar ráða ekki við þá

Það var blíða í Grindavík í dag en svo vel hefur viðrað til róðra að undanförnu að varla hefur dottið út dagur frá áramótum. Bátarnir hafa aðeins þurft að sigla í tvo tíma út frá Grindavík til að komast í mokfiskerí.

Eiríkur Tómasson, forstjóri Þorbjarnar hf., segir aflabrögð mjög góð. Bátarnir séu að koma með mikinn afla að landi. Þrátt fyrir aukinn þorskkvóta þurfi enn að beina bátum frá þorskinum yfir í aðrar tegundir. Viðbótin auðveldi mönnum þó að skipuleggja veiðarnar.

Grindvískir sjómenn eru reyndar alvanir golþorskum en yfirleitt síðla vetrar þannig að það kemur skemmtilega á óvart að sjá hve hátt hlutfall er af stórþorski nú en allt upp í 40% hefur verið yfir 8 kíló að þyngd. Flökunarvélarnar ráða ekki við svo stóra fiska og því verður að handflaka. Menn kvarta þó ekki enda fæst hærra verð fyrir stóra fiskinn.

Að hætti Grindvíkinga verða þessir þorskar að saltfiski sem Spánverjar og Portúgalar greiða fyrir með verðmætum evrum. Um 400 manns vinna hjá Þorbirni, sem er eitt af stærstu útgerðar- og fiskvinnslufyrirtækjum landsins. Fyrirtækið gerir út sjö fiskiskip, þrjá togara og fjóra línubáta.

Eiríkur Tómasson segir það samdóma álit sjómanna, að minnsta kosti þeirra sem sækja sjóinn vestantil á landinu, að fiskurinn sé mjög vel haldinn. Hann hafi greinilega verið í mjög góðu æti. Það sé mikil lifur í honum og óvenju laus fita sé í þorskinum. Það sé merki um að hann hafi komist í gott æti í haust. Stór fiskur sé að veiðast í miklu meira mæli en verið hefur um árabil. Það sé að þakka friðunaraðgerðum á undanförnum árum.