Ekkert hótelfyrirtæki boðið samstarf

„Allar athuganir okkar af þessu tagi eru reistar á grun um brot á samkeppnislögum,“ segir Páll Gunnar Pálsson, forstjóri Samkeppniseftirlitsins, sem á miðvikudag í síðustu viku aflaði gagna með húsleitarheimild á skrifstofum þriggja hótelrekanda.

Hótelfyrirtækin sem um ræðir eru Flugleiðahótelin, Grand Hótel og Hótel Saga. Grunur leikur á um að þau hafi brotið tíundu grein samkeppnislaga sem bannar samráð. Aðspurður segir Páll að ekkert fyrirtækjanna hafi gengið til samstarfs við Samkeppniseftirlitið til að upplýsa málið. Eins og kunnugt er fá fyrirtæki sem það gera lægri sektir fyrir slíka samvinnu. Búast má við háum sektum komi á daginn að hótelin hafi haft með sér ólöglegt samráð. Hámarkssekt er tíu prósent af veltu brotlegs fyrirtækis.

Páll segir gagnaöflunina nú gerða í framhaldi og vera lið í stærri athugun sem snýr að ferðaþjónustunni. „Upphaflega athugunin hófst árið 2007 með húsleit hjá Samtökum aðila í ferðaþjónustunni, sem flest svið ferðaþjónustunnar eiga aðild að. Þá var jafnframt aflað gagna hjá ferðaskrifstofum,“ segir Páll sem kveður heildarathugunina vel á veg komna.

„Nú verður unnið úr þessum nýju gögnum. Athuguninni verður vonandi lokið sem fyrst en það er ekki hægt að tímasetja það.

Meðal þeirra hótela sem heyra undir ofangreind fyrirtæki eru Icelandair-hótelin, Eddu hótelin og Fosshótel og Hilton Reykjavik Nordica, Hótel Saga og Hótel Ísland. - gar