Ráðherra þarf stuðning frá meirihluta þings fyrir þingrof

Það er röng túlkun að enginn forsætisráðherra sé starfandi í landinu, að mati Bjargar Thorarensen, forseta lagadeildar Háskóla Íslands.

„Forsætisráðherra í starfsstjórn er starfandi forsætisráðherra," segir Björg. Um leið og Ólafur Ragnar Grímsson, forseti Íslands, tilkynnti fréttamönnum í dag að hann hefði beðið ráðherra ríkisstjórnarinnar um að starfa áfram í ráðuneytum sínum sagði hann að þar sem Geir Haarde forsætisráðherra hefði beðist lausnar væri enginn starfandi forsætisráðherra, sem gæti gert tillögu um þingrof. Þess vegna væri þingrofsvald hjá forseta Íslands.

Björg er ekki sammála þessu. Hins vegar telur hún að vafasamt sé hversu umdeildar ákvarðanir forsætisráðherra starfstjórnar geti tekið án þess að vera búinn að tryggja sér að minnsta kosti óformlega stuðning frá meirihluta þingsins. Forsætisráðherra yrði því að tryggja sér meirihluta í þinginu til þess að rjúfa þing. Annað væri andstætt þingræðisreglunni.