BBC neitar að sýna fjáröflunarþátt fyrir fólkið á Gaza

Deilur hafa blossað upp á Bretlandi vegna þeirrar ákvörðunar BBC að neita að sýna fjáröflunarþátt sem regnhlífarsamtök hjálparsamtaka hafa sett saman og er ætlað að styðja við fólk í neyð á Gaza svæðinu.

Mark Thompson, útvarpsstjóri breska ríkisútvarpsins, tók ákvörðunina á þeim forsendum að BBC taki ekki afstöðu í deilunni. Með því að sýna þáttinn gæti virst sem svo að BBC væri að taka afstöðu með Palestínumönnum og gegn Ísraelum.

Sky sjónvarpsstöðin hefur tekið sömu ákvörðun og BBC og ætlar ekki að sýna þáttinn en stöðvarnar ITV, Channel 4 og Channel 5 ætla allar að setja hann í loftið. Málið hefur vakið mikla athygli í Bretlandi og 60 þingmenn hafa skrifað undir bænaskjal til BBC um að endurskoða ákvörðunina en Thompson sagði í morgun að afstaða hans hafi ekkert breyst.

Þá hefur erkibiskup Ensku biskupakirkjunnar lýst því yfir að BBC ætti að taka mannúðarsjónarmið fram yfir hlutleysissjónarmið. „Almenningur gerir þá kröfu til okkar að við stöndum vörð um hlutleysi BBC og það er mitt starf, sagði Thompson í morgun.

Hann neitaði því einnig að ákvörðunin hafi verið tekin eftir þrýsting frá hópum sem styðja Ísrael.