Skattsvikamáli Jóns Ólafssonar vísað frá Hæstarétti

Hæstiréttur vísaði í dag frá dómi kæru Ríkislögreglustjóra í máli Jóns Ólafssonar, Hreggviðs Jónssonar og Ragnars Birgissonar. Héraðsdómur vísaði málinu frá dómi þann 17. desember en þeir félagar voru ákærðir fyrir skattsvik í tengslum við rekstur Norðurljósa og annara tengdra félaga.

Helgi Magnús Gunnarsson kærði úrskurðinn til Hæstaréttar sem vísaði málinu frá í dag á grundvelli þess að saksóknara láðist að greina frá dómkröfum ákæruvaldsins auk þess sem ekki var tilgreint í hvaða skyni væri kært.

Í úrskurði Hæstaréttar segir að fullt tilefni hafi verið til þess af hálfu handhafa ákæruvalds að hann „fylgdi einföldum en nauðsynlegum formkröfum....með því að taka fram í hvaða skyni væri kært og hvaða kröfur gerðar." Þetta hafi hann ekki gert og því komist rétturinn ekki hjá því að vísa málinu frá.

Dóm Hæstaréttar má lesa í heild sinni hér.