Hátíð hafsins haldin hátíðleg

Líf og fjör verður á Grandagarði í Reykjavík alla helgina þar sem haldin er Hátíð hafsins. Þetta er í ellefta sinn sem að hátíðin er haldin en hún samanstendur af Hafnardeginum og Sjómannadeginum.

Skúli Gautason, viðburðarstjóri Höfuðborgarstofu, segir að hingað til hafa hátíðarhöldin farið fram á Miðbakka Reykjavíkurhafnar en í ár hafi verið ákveðið að flytja þau vestur á Granda. Grandagarðinum er lokað fyrir almennri umferð fram á sunnudagskvöld og er mikið um að vera alla helgina.

Á hátíðinni verða til sýnis allir helstu nytjafiskar við Ísland auk fjölmargra fisktegunda sem finnast í úthafinu og koma sjaldan fyrir sjónir almennings. Þar má meðal annars sjá gulldeplu sem var nokkuð í fréttum í vetur sem leið og stóra bramafisk, en í fyrrasumar veiddust fjölmargir slíkir fiskar við Suðurland. Fjölmargir aðrir forvitnilegir fiskar verða til sýnis. Þá verða fluttir stuttir fræðslupistlar um fiskana og ýmislegt þeim tengt.