Lögregla elti ölvaðan ökumann

Ölvaður ökumaður á þrítugsaldri sinnti ekki stöðvunarmerkjum lögreglu, eftir að hann hafði mælst á 110 kílómetra hraða á Sæbraut í Reykjavík rétt upp úr miðnætti, heldur ók greitt vestur á bóginn.

Hann ók meðal annars yfir gatnamót á rauðu ljósi en með samstilltri aðgerð lögreglumanna á þremur lögreglubílum tókst að króa hann af vestur í bæ. Kom þá í ljós að hann var líka réttindalaus eftir að hafa áður verið sviptur ökuréttindum vegna ölvunaraksturs. Hann sefur nú úr sér ölvímuna í fangageymslum og verður yfirheyrður í dag.