Paris eltir Ronaldo til Madrídar

Hrifning Paris Hilton á portúgalska framherjanum Cristiano Ronaldo virðist ætla að verða uppspretta að góðu fríi í Evrópu samkvæmt erlendum slúðurmiðlum.

Þau voru mynduð saman á góðri stund á næturklúbbum í Los Angeles fyrr í mánuðinum og virtist líka allvel hvort við annað.

Nú hefur Paris sagt vinum sínum að hún ætli að skella sér til Madrídar að hitta kappann í sumar og skoða sig svo um í Evrópu.

„Ég ætla klárlega til Madrídar að hitta hann," á hún að hafa sagt.

Paris er að sögn ansi hrifin af Evrópu.

„Ég elska að vera í Evrópu. Þeir fatta mig þar. London er klárlega uppáhalds borgin mín. Ég væri klárlega til í að flytja þangað einhverntíman. Það er fullt af veitingastöðum þar með góðan mat og svo elska ég Top Shop og Harrods," bætti hún við og sagðist að lokum dýrka breskan hreim.