Eyfi ekki raðmorðinginn í Suður-Karólínu

„Ég hef verið víða í Bandaríkjunum en ekki komið til Karólínu. Ég þekki konu sem heitir Karólína en hún býr í Hafnarfirði," segir Eyjólfur Kristjánsson tónlistarmaður - Eyfi.

Nýjustu fréttir af raðmorðingja sem leikið hefur lausum hala í Suður-Karólínu eru að þar fór líklega Patrick Tracy Burris sem lögreglan skaut til bana á mánudag - en ekki Eyfi eins og ábendingar sem Fréttablaðinu bárust gætu gefið til kynna: „Veit einhver hvar Eyfi er?"

Teikningar sem lögreglan lét gera af raðmorðingjanum þykja sláandi líkar Eyfa. „Ég er reyndar hættur að ganga með derhúfu, er stoltur af höfuðlaginu eftir að hárið fór að hverfa. Já, þeir hafa náð honum. Hvar sé ég þessa teikningu? Já, vá! Þetta er ekki ólíkt mér," segir Eyfi forviða í samtali við blaðamann. Aðspurður hvort þetta geti verið tvíburabróðir hans telur hann það ólíklegt.

Eyfi segir þá sögu að þegar hann var að spila með Hálft í hvoru í Barbican Center í London árið 1984 lenti hann í þeirri sérkennilegu lífreynslu að þau í bandinu voru að labba úti á götu og þá stígur maður út úr flottum bíl. „Og ég get svarið að þetta var eins og að líta í spegil. Við vorum nákvæmlega eins. Honum brá einnig og það varð almennur hlátur uppúr þessu. Í kjölfarið læddust að manni ýmsar grunsemdir," segir Eyfi léttur.

En fjarvistarsönnun hans er í góðu lagi. Hann var úti í Eyjum alla helgina að spila tónlist á Goslokahátíð auk þess sem hann skaust upp á Skaga til að spila brekkusöng á Írskum dögum þar. „Þannig að ég hafði engan tíma til að sinna raðmorðum í Suður-Karólínu - það er ef ég hefði þær kenndir í mér."