Suðurnesja-strákar vilja læra dans

„Þegar ég var í háskóla var ég oft með námskeið í Keflavík og á Akureyri. Eftir það var maður oft að hitta gömlu nemendurna og það var verið að skora á mann að koma aftur, svo ég tók bara ákvörðun um að láta verða af þessu núna,“ segir Ásta Bærings dansari sem opnar dansskólann Danscentrum í Reykjanesbæ 11. janúar næstkomandi.

Sjálf er Ásta aðalkennari skólans, en hún hóf dansnám í Danslistarskóla JSB aðeins fimm ára gömul og lauk dansaradiplómu árið 2001. Síðan þá hefur hún starfað sem dansari og danshöfundur í leikhúsum og tekið þátt í söngleikjum á borð við Fame, Grease og Hafið bláa svo eitthvað sé nefnt. Aðspurð segir hún námið skiptast í tvær annir og fjölbreytileikann vera í fyrirúmi, en nemendur læra ýmsa dansstíla svo sem, jazzdans, street jazz og hip hop. „So You think you can dance-þættirnir eru svolítil fyrirmynd að náminu. Allir læra ákveðna grunntækni, en við viljum að nemendur geti tileinkað sér mismunandi dansstíla,“ segir Ásta. Auk hennar kenna þær Guðríður Hafsteinsdóttir og Ósk Björnsdóttir við skólann, en vegna fjölda stráka sem hafa skráð sig ætlar hún að bæta við kennara. „Það eru rúmlega 100 nemendur búnir að skrá sig og þar af eru rúmlega tuttugu strákar. Ég er náttúrlega tilbúin að gera allt til að halda þeim og vil ekki að þeir flosni upp úr dansnáminu,“ útskýrir hún og hvetur nemendur til að skrá sig sem fyrst, en opið verður fyrir skráningu til 9. janúar á heimasíðu skólans danscentrum.is. -ag