Brottvikning seðlabankastjóranna gæti kostað um 200 milljónir

Yfirstjórn Seðlabanka Íslands verður endurskipulögð með hraði, verði af myndun nýrrar ríkisstjórnar, en það gæti kostað um 200 milljónir að víkja seðlabankastjórum eða leggja störf þeirra niður.

Unnið er að því hörðum höndum að finna varanlega útfærslu á breyttri starfsemi Seðlabankans, en líklegt er að lagabreyting þurfi að koma til. Bæði Samfylking og Vinstri grænir vilja að Davíð Oddsson og hinir bankastjórarnir tveir axli ábyrgð á þætti bankans í efnahagsóreiðunni, vilja þá burt og einn faglegan stjórnanda í staðinn. Sú ríkisstjórn sem er í burðarliðnum segir að ekki sé eftir neinu að bíða.

Áhöld eru um það hvort lagastoð sé fyrir því að víkja bankastjórunum fyrirvaralaust úr starfi, en engin fordæmi eru fyrir því. Heimildir fréttastofu herma að á frægum fundi viðskiptanefndar Alþingis í desember síðast liðnum, hafi Davíð dregið það í efa, fullyrt að lagaheimildir væru veikar og að reglugerð um Seðlabankann, sem segði annað, væri dæmi um lélega lögfræði.

Yrði honum hins vegar vísað á dyr sagðist Davíð ætla að fara fram á full laun til loka skipunartíma síns. Það gæti orðið skattborgurunum dýrkeypt, því full laun til bankastjóranna þriggja út skipunartíma þeirra næmi í það minnsta 170 milljónum króna og eru þá bílafríðindi og aðrar sporslur ekki taldar til. Heimildir herma að nú sé mikill titringur meðal starfsmanna Seðlabankans yfir þeim breytingum sem liggja í loftinu.