Átta virkjanir gæti þurft fyrir Helguvík

Iðnaðarráðherra hefur fyrir hönd ríkisstjórnarinnar gefið grænt ljós á að Norðurál reisi allt að 360 þúsund tonna álver í Helguvík en það yrði að framleiðslugetu tvöfalt stærra en álverið í Straumsvík. En hvaðan á fá þau 625 megavött sem þarf til að bræða allt þetta ál í Helguvík?

Hitaveita Suðurnesja áformar að virkja á þremur stöðum; á Reykjanesi, Eldvörpum og í Krýsuvík, og ná þannig samtals 250 megavöttum. Þá vantar 375 megavött.

Orkuveita Reykjavíkur hefur sett upp áætlun um um þrjár virkjanir í þessu skyni; á Hellisheiði, í Hverahlíð og við Gráuhnjúka, og hyggst þannig afla 175 megavatta. Þessar sex virkjanir duga ekki til því enn vantar þá 200 megavött.

Líklegt þykir að horft verði til Bitruvirkjunar en samt vantar enn meira. Hluti virkjana neðri Þjórsár, eða allar þrjár, gætu brúað bilið. Iðnaðarráðherra leggst hins vegar gegn því að orkan þaðan fari í Helguvík, og segir að Norðurál verði að sætta sig við minna álver dugi ekki rafmagnið frá Orkuveitu Reykjavíkur og Hitaveitu Suðurnesja.

Júlíus Jónsson, forstjóri Hitaveitu Suðurnesja, og Guðlaugur Sverrisson, stjórnarformaður Orkuveitu Reykjavíkur, segja báðir að þau fyrirtæki séu ekki í stakk búin til að útvega alla orkuna innan tímarammans, en álverið á að vera komið í fullan rekstur árið 2015.

Í þingliði sjálfstæðismanna efast menn um að rétt sé að útiloka Þjórsá fyrir Helguvík. Jón Gunnarsson segir að ef iðnaðarráðherra sé á móti því að nota orkuna úr neðri hluta Þjórsár verði hann að benda á aðra valkosti.