Hafa þungar áhyggjur af lækkandi lánshæfismati

InDefence hópurinn hefur sent frá sér yfirlýsingu þar sem hann lýsir áhyggjum vegna niðurstöðu greiningar Íslandsbanka um hugsanlega lækkun á lánshæfismati ríkissjóðs Íslands vegna Icesave skuldbindingar. Magnús Árni Skúlason, einn forvsvarsmanna InDefence, undirstrikar þetta í samtali við Vísi.

Magnús segir lánshæfismat landsins afar mikilvægt því skuldbindingarnar sem þjóðin tekur á sig séu í erlendri mynt.

„Við sjáum það að sum fyrirtæki með skuldabréf útgefin hafa skilyrði í lánasamningum um að lánshæfismatið megi ekki fara niður í „junk". Þá eru lánin gjaldfelld," segir Magnús og tekur orkufyrirtækin sem dæmi um aðila sem gætu hugsanlega lent illa í lækkandi lánshæfismati. Hann bætir við að margir fjárfestingarsjóðir hafi það í sínum samþykktum að þeir megi ekki lána til ríkja eða fyrirtækja með lánshæfið C eða „junk".

„Það er mjög mikilvægt að ganga úr skugga um þetta atriði áður en lengra er haldið og sjá hverjar framtíðarhorfurnar eru," segir Magnús. „Það þarf að fækka ef-unum í Icesave."