Segir skattahækkanir ríkisstjórnarinnar stórhættulegar

Skattahækkanir ríkisstjórnarinnar við þær aðstæður sem nú eru í íslensku efnahagslífi eru stórhættulegar og allar líkur eru á því að þær bæði dýpki og lengi þá kreppu sem nú stendur yfir, segir Illugi Gunnarsson, þingflokksformaður Sjálfstæðisflokksins. Hann segir að heimilin í landinu þoli ekki hærri skatta ofan á launalækkun, hærri afborganir á lánum og minni atvinnu.

Í yfirlýsingu sem Illugi sendi frá sér í dag segir hann það rangt sem ríkisstjórnin hafi fullyrt og formenn þingflokka hennar fullyrtu í morgun að skattar muni lækka hjá þeim sem lægst hafa launin. „Afnám vísitölutengingar persónuafsláttar er ígildi skattahækkunar á almenning og þar með þeirra sem hafa lægstar tekjur. Þetta er augljóst, þar sem virði persónuafsláttar minnkar vegna verðbólgu og því fylgja skattleysismörk ekki verðlagsþróun," segir Illugi.

Illugi bendir á að þessi staðreynd hafi verið fjárálaráðherra ljós árið 2003 miðað við grein hans í Morgunblaðinu þann 13. mars það ár. Illugi segir að skattbyrði láglaunafólks minnki ekki með því að afnema lögbundna hækkun persónuaflsáttar, með hækkun virðisaukaskatts eða með nýjum sköttum á eldsneyti, rafmagn og heit vatn og ýmsum öðrum skattahækkunum. „Hafi það verið markmið að hækka ekki skatta hjá láglaunafólki, þá hefur því markmiði augljóslega ekki verið náð," segir Illugi.

Þá hafnar Illugi fullyrðingum um að framsetning á efni Sjálfstæðisflokksins um skattahækkanir sé villandi.