Sinueldur við Hafravatn - Brennuvargur var að grilla

„Við vorum að grilla, og svo spörkuðum við grillinu niður og eldurinn breiddist út án þess að við gætum nokkuð gert," sagði brennuvargur sem hringdi í Vísi nú fyrir stundu og sagði að hann, ásamt fleirum, hefðu verið að grilla við Hafravatn. Það endaði með því að grillið féll og eldur læstist í grasinu sem endaði með miklum sinueldi. Mikill reykur leggur yfir borgina og mjög hvasst er á svæðinu.

Aðspurður hvort brennuvargurinn hefði látið slökkviliðið vita sagðist hann ekki hafa gert það. Spurður hversvegna, svaraði hann því til að það væri eflaust einhver búinn að hringja, reykurinn færi í það minnsta ekki framhjá neinum.

Vísir hafði samband við slökkviliðið á höfuðborgarsvæðinu sem var þegar búið að senda bíla á vettvang til þess að ráða niðurlögum eldsins.