Jagielka vill vera áfram hjá Everton

Phil Jagielka, varnarmaður Everton, segist gjarnan vilja framlengja samning sinn við enska úrvalsdeildarfélagið.

Jagielka hefur átt góðu gengi að fagna á leiktíðinni og gegn lykilhlutverki í liði Everton. Hann varð hins vegar fyrir áfalli í síðasta mánuði er hann meiddist illa á hné og þurfti hann að fara í aðgerð vegna þeirra. Hann verður væntanlega ekki aftur klár í slaginn fyrr en snemma á næsta tímabili.

Hann sagði í samtali við enska fjölmiðla að hann hafi hafið viðræður við Everton um framlengingu á samningi sínum áður en hann meiddist.

„Mér sýnist á öllu að þær viðræður geti haldið áfram þrátt fyrir meiðslin. Ég er ekki 100 prósent viss um hvenær ég muni geta skrifað undir nýjan samning en okkur liggur ekkert á."