Björgunarleiðangur á Öxnadalsheiði í gærkvöldi

Vegagerðin á Akureyri sendi björgunarleiðangur upp á Öxnadalsheiði í gærkvöldi til að aðstoða vegfarendur, sem þar höfðu lent í vandræðum vegna óveðurs. Þar höfðu meðal annars fjórir bílar farið út af en engan í þeim sakaði.

Hins vegar meiddist ökumaður, en þó ekki alvarlega, þegar bíll hans flaug 25 metra út af veginum yfir Fjarðarheiði, á milli Seyðisfjarðar og Egilsstaða, og lenti á hjólunum. Ekki er vitað um önnur óhöpp eða erfiðleika á öðrum fjallvegum þrátt fyrir afleitt veður í gærkvöldi og fram eftir nóttu.

Víða varð ófært á fjallvegum þegar líða tók á kvöldið. Það er líka bullandi bræla undan ströndum landsins, en sára fá skip eru á sjó og engir smábátar.