Stefán Jón óskar eftir lengra leyfi frá borgarstjórn

Stefán Jón Hafstein sem kjörinn var í borgarstjórn fyrir Samfylkinguna í maí 2006 hefur óskað eftir framlengdu leyfi frá störfum sem borgarfulltrúi um ótiltekinn tíma.

Stefán Jón var ráðinn verkefnisstjóri Þróunarsamvinnustofnunar Íslands í Namibíu í desember 2006. Hann hefur verið í launalausu leyfi frá borgarstjórn frá 1. febrúar 2007 og hugðist snúa aftur 1. febrúar 2009.

Gísli Marteinn Baldursson, borgarfulltrúi Sjálfstæðisflokksins, er líkt og Stefán Jón í launalausu leyfi. Gísli hyggst þó snúa aftur á vettvang borgarmálanna 1. júní næst komandi.