Nýgræðingarnir sitja lengst frá forsætisráðherranum

Það voru viðbrigði fyrir nýja dómsmálaráðherra að mæta til fundar undir tifandi sjónvarpsmyndavélum innlendra og erlendra fréttamiðla. Nýi viðskiptaráðherrann var kominn í virðulegan ráðherrafrakkann, félagsmálaráðherrann kom akandi á gamla bílnum hans Geirs, flottasta ráðherrabílnum, en nýi menntamálaráðherran skokkaði léttfætt en kappklædd úr ráðuneyti sínu yfir Arnarhólinn.

Þetta voru tímamót, Jóhanna Sigurðardóttir var sest í forsætið til að stýra fyrsta ríkisstjórnarfundi sínum og búið að skipta út kökum og kleinum fyrir nýskorið grænmeti. Ráðherrarnir hafa ekki langan tíma, í mesta lagi átta vikur áður en Alþingi verður slitið til að heyja kosningabaráttu en áður vilja þeir lögfesta 15 til 20 frumvörp. Jóhanna segir mikilvægustu verkefnin snúa að heimilunum í landinu og aðgerðum til að koma bönkunum og atvinnulífinu í gang. Einnig eru boðaðar breytingar á stjórnarskránni.

Fyrstu frumvörpin eru væntanleg í vikunni, frumvörp um greiðsluaðlögun, um nauðungarsölu og um aðför, allt til að gefa fólki sem á ekki fyrir skuldunum lengri frest.

En það er ekki sama hvar ráðherrarnir sitja við borðið, því ráða gamlar venjur og siðir. Næst forsætisráðherra sitja flokksformenn en þar næst ráðherrar með lengstan starfsaldur, síðan er horft til þingreynslu og loks lífaldurs þannig að því lengra sem þú ert látinn sitja frá forsætisráðherranum, því meiri nýgræðingur eru álitinn.