Yfirgaf Paris og fór til Vegas

Knattspyrnukappinn Cristiano Ronaldo yfirgaf Paris í gær og hélt til Las Vegas þar sem hann hyggst halda áfram að skemmta sér. Ronaldo snéri bakinu við lystisemdum Hilton í Los Angeles og hreiðraði um sig á fimm stjörnu Wynn hótelinu í höfuðborg spilavítanna, Las Vegas.

Líkt og fram hefur komið í fréttum um helgina eyddi hann tveimur nóttum með hótelerfingjanum Paris Hilton, en hann mun hafa boðið henni með til Vegas.

Paris mun hinsvegar hafa þurft að afþakka boð kvennamannsins og knattspyrnukappans, þar sem hún var búin að bóka flug til Dubai, til þess að vera viðstödd tökur á nýja sjónvaprsþætti sínum, My Best Friend.

Í gærkvöldi skemmti Ronaldo sér með vinum sínum i Vegas, á meðan Paris var með Nicky systur sinni og hundi sínum á hinum virta veitingastað Mr Chow í Los Angeles.

Sagan segir hinsvegar að ekki líði á löngu þar til Ronnie og Paris muni hittast á ný.