Forsetinn fékk fyrsta eintakið

Ný hljóðbók MND-félagsins var gefin út í gær. Bókin nefnist Björt framtíð og er samsafn greina eftir 49 höfunda á þremur hljóðdiskum. Það var forseti Íslands, Ólafur Ragnar Grímsson, sem fékk fyrsta eintakið afhent. Sjálfur á hann eina grein í bókinni og les hana upp sjálfur.

Áætlun félagsins er að útgáfan stuðli að aukinni ánægju og vellíðan þjóðarinnar.

„Það má segja að félagið sé með þessu að benda fólki á mikilvægi þess að missa aldrei vonina.Við sem erum MND-veik höfum lifað við lyfjakreppu og án lækningar í eitt hundrað ár. Ef þessar greinar vekja einstaka bros og von hjá þeim sem á hlýða þá er takmarkinu náð. Það sem heldur okkur í MND-félaginu gangandi og eykur lífsgæði okkar í þessu svartnætti, er vonin og það að sjá ljósglætu fram undan,“ segir Guðjón Sigurðsson, formaður MND-félagsins.

Hægt er að nálgast bókina bæði í gegnum símasölu sem og á heimasíðu MND-félagsins www.mnd.is.- hds