Hæstiréttur hefur vísað frá kæru saksóknara í skattamáli Jóns Ólafssonar og fleiri vegna handvammar sækjanda. Sækjandi hefur óskað eftir leyfi til að kæra málið að nýju til Hæstaréttar.
Þeir Jón Ólafsson, Hreggviður Jónsson og Ragnar Birgisson voru ákærðir fyrir meiri háttar skattalagabrot vegna eigin skattskila og vegna skattskila Norðurljósa, Skífunnar og Íslenska útvarpsfélagsins. Héraðsdómur komst að þeirri niðurstöðu í desember að þar sem búið væri að refsa þremenningunum fyrir skattalagabrot með auknu skattaálagi bæri að vísa málinu frá.
Hæstiréttur tók ekki afstöðu til niðurstöðu héraðsdóms. Í dómi Hæstaréttar segir að saksóknari hafi ekki fylgt formkröfum um að tilkynna Hæstarétti hvað nákvæmlega hafi verið kært til réttarins, og hvaða kröfur hann hafi gert. Því beri að vísa málinu frá.
Helgi Magnús Gunnarsson, saksóknari efnahagsbrota hjá Ríkislögreglustjóra, segir þetta leiðinleg mistök, en framsetning kærunnar hafi ekki verið frábrugðin öðrum kærum. Málum hafi ekki verið vísað frá vegna þessa áður.
Búið er að óska eftir leyfi frá Hæstarétti til að kæra málið að nýju, þar sem tímafrestur til að kæra niðurstöðu héraðsdóms er runninn út, segir Helgi. Hann segist vongóður um að það leyfi verði veitt í ljósi aðstæðna.- bj
