Landhelgisgæslan frestar uppsögnum

Fyrirhugaðar uppsagnir hjá Landhelgisgæslu Íslands hafa verið dregnar til baka. Þetta kemur fram á heimasíðu Gæslunnar en þar tilkynnir Georg Kr. Lárusson forstjóri starfsmönnum sínum um að uppsögnunum hafi verið frestað.Til stóð að segja upp 20 til 30 starfsmönnum hjá stofnuninni.

„Að undanförnu hefur verið unnið að því í samstarfi við ykkur starfsmenn og stéttarfélög ykkar að endurskipuleggja störf, breyta starfshlutfalli, leita tímabundinna starfa á sérsviði starfsmanna erlendis og fleira," segir Georg. „ Þessar aðgerðir eru nú þegar farnar að bera nokkurn árangur og verður þeim haldið áfram. Þá verður enn frekar reynt að finna tímabundin verkefni erlendis fyrir tæki og áhafnir Landhelgisgæslunnar. Því er þessi ákvörðun tekin nú. Áfram verður unnið að endurskoðun og endurskipulagningu á rekstri og þær aðgerðir sem nú þegar hefur verið ákveðið að ráðast í og fram komu í greinargerð sem send var ykkur og stéttarfélögum sl. fimmtudag, munu koma til framkvæmda. Ég mun upplýsa ykkur eftir föngum um framgang mála sem vonandi mun skýrast á næstu vikum," segir forstjórinn ennfremur.

Í tilefni af þessu lýsir SFR, stéttarfélag í almannaþágu, sem hafði mótmælt uppsögnunum, yfir ánægju sinni með það að uppsagnir hafi verið dregnar til baka og áéttar að í efnahagsþrenginum þeim sem nú ganga yfir sé launafólk ekki látið bera byrgðirnar með því að kasta þeim út í atvinnuleysi.