Samfylkingarfólk klappaði fyrir mótmælendum

Stjórn Samfylkingarfélagsins í Reykjavík hefur lagt fram tillögu um að boðað verði til kosninga ekki síðar en í maí á þessu ári.

Það var Ásgeir Beinteinsson formaður félagsins sem lagði fram tillöguna á fundi félagsins í kvöld. Ekki hafa verið greidd atkvæði um hana, en það verður gert síðar i kvöld. Lúðvík Bergvinsson, þingflokksformaður Samfylkingarinnar, og Mörður Árnason íslenskufræðingur fluttu svo erindi á fundinum. Um 300-400 félagar í Samfylkingunni eru samankomnir á fundinum.

Í ræðu sinni sagðist Lúðvík Bergvinsson vilja kosningar á árinu og sem fyrst. Hann sagðist jafnframt hafa heyrt í mörgum sjálfstæðismönnum sem væru sammála því. Lúðvík sagði að hægt væri að velja um marga kosti þangað til. Núverandi stjórn gæti starfað fram á vor, hægt væri að skipa utanþingsstjórn og svo mætti jafnframt fara þá leið sem formaður Framsóknarflokksins lagði til.

Mörður Árnason sagði að ríkisstjórnin hefði misst umboð sitt í október og misst trúnað. Sjálfstæðisflokkurinn bæri meginábyrgð. Samfylkingin ætti að beita sér fyrir því að haldnar yrðu kosningar. Hann sagði jafnframt að mistök og ábyrgð Samfylkingarinnar fælust í því að hafa samið sig frá stjórn efnahagsmála í maí 2007. Hann vonaðist eftir því að ráðherrar tækju hér eftir réttar ákvarðanir fyrir þing og þjóð. Hann lauk ræðu sinni á því að krefjast þess að kosningar yrðu haldnar strax.

Mótmælendur réðust inn á fundinn um hálfníuleytið, eða í þann mund sem hann var að hefjast. Þegar þeir voru komnir inn í Þjóðleikhúskjallarann og kyrjuðu „Vanhæf ríkisstjórn" tóku fundarmenn undir með lófaklappi, að sögn fréttamanna Stöðvar 2 og Vísis sem eru á staðnum.