Ungir jafnaðarmenn krefjast kosninga

Ungir jafnaðarmenn krefjast þess að sitjandi ríkisstjórn boði til kosninga í vor. Þetta kemur fram í ályktun sem stjórn Ungra jafnaðarmanna hefur samþykkt. Þar segir að hvorki Alþingi né ríkisstjórnin hafi lýðræðislegt umboð lengur, til þess að taka þær erfiðu ákvarðanir sem þjóðin standi frammi fyrir. Ef hún geti ekki orðið við þeirri eðlilegu kröfu þá eigi Samfylkingin að slíta stjórnarsamstarfinu.

Í kjölfarið verði Samfylkingin að fá stuðning frá VG og Framsókn til þess að mynda tímabundið starfsstjórn sem sameinast um að boða til kosninga í vor og koma nýjum stjórnendum í Seðlabankann og Fjármálaeftirlitið.

Vilja aðildarumsókn að ESB

Þá telja Ungir jafnaðarmenn að Samfylkingin eigi að gera aðildarumsókn að Evrópusambandinu að forgangsmáli sem ekki verði vikið frá. Enginn lýðræðislegur flokkur geti verið á móti því að gefa þjóðinni kost á að kjósa um aðildarsamning.

Þá telja ungir jafnaðarmenn að ef Samfylkingin og Vinstri græn nái meirihluta í komandi kosningum, myndi þessir tveir flokkar ríkisstjórn undir kjörorðinu Jafna Ísland. Með því að stuðla að kosningum og ganga bundin til þeirra haldi Samfylkingin trausti kjósenda sinna sem flokkur jafnaðar og lýðræðis.