Ego verður N1

Þessa dagana er verið að breyta útliti á 7 mannlausum eldsneytisstöðvum sem hingað til hafa verið reknar undir nafni Egó.

Allar þessar stöðvar munu bera merki N1 og verða hluti af þjónustuframboði N1 til bíleigenda.

Þetta kemur fram í tilkynningu frá N1. Þar segir að stöðvarnar sem um ræðir séu við Salaveg, Smáralind, Holtagarða, Fellsmúla, Staldrið og Tryggvabraut Akureyri.

„Með þessari breytingu geta tugþúsundir viðskiptavina N1 nýtt sér lægsta eldsneytisverðið sem N1 býður á sjálfvirkum útsölustöðum.

Fjölmargir viðskiptavinir Egó geta nú nýtt sér alla útsölustaði N1 um land og notað áfram bæði kort og greiðslulykla á þeim útsölustöðum.

Breyting þessi er þegar komin til framkvæmda og útliti fyrstu stöðvanna hefur verið breytt og breytingar annara stöðva klárast á næstu dögum.

Frá og með deginum í dag geta tugþúsundir Viðskiptakorthafa hjá N1 nýtt sér 3 þjónustustig þ.e.a.s. mannlausa stöð með sjálfsafgreiðslu, þjónustustöð með sjálfsafgreiðslu eða þjónustustöð með fullri þjónustu. Ekkert annað fyrirtæki býður uppá meiri breidd í þjónustu.

Jafnframt þessu skrefi hefur N1 hafið birtingu á eldsneytisverði á heimasíðu sinni. Þar birtist algengasta útsöluverð N1 um land allt og auk þess birtast lægstu útsöluverð okkar á höfuðborgarsvæðinu og á landsbyggðinni. Hinar nýju mannlausu stöðvar munu verða hluti af þessu verðframboði N1."