Obama bestur fyrir veröldina

„Ég fagna embættistöku Obama mjög og hún vekur hjá mér vonir um að það bregði til betri tíðar hvað varðar utanríkismál og almenna stefnu bandarískra stjórnvalda. Mikið óskaplega er ég líka feginn að losna við Bush, og þótt fyrr hefði verið,“ segir Steingrímur J. Sigfússon, formaður Vinstri grænna, um embættistöku Baracks Obama í gær.

Steingrímur segir athyglisvert fyrir íslensku þjóðina að fylgjast með þeirri von sem Obama hefur kveikt vestanhafs. „Það skyldi þó ekki vera að okkur vantaði það sama hér, að með nýrri forystu myndi þjóðin aftur öðlast trú á framtíðina,“ segir Steingrímur.

Guðjón Arnar Kristjánsson, formaður Frjálslynda flokksins segir miklar væntingar vera gerðar til Obama.

„Ég held að mörgum friðelskandi mönnum í veröldinni hafi ekki verið sama um hvernig þessar kosningar færu. En Obama er sá kandídat sem ég taldi bestan fyrir Bandaríkin og veröldina alla, ég hef trú á honum og vona að hann standi sig vel í starfi,“ segir Guðjón Arnar Kristjánsson, formaður Frjálslynda flokksins, um embættistöku Obama.

„Í ljósi stöðunnar í heimsmálunum er fólk kannski að gera of miklar væntingar til Obama í núverandi stöðu, en vonandi stendur hann undir þeim,“ segir Guðjón Arnar.- kg