Mun ekki boða til kosninga

Geir Haarde forsætisráðherra býst við því að hann verði formaður Sjálfstæðisflokksins eftir landsfund. Þetta sagði hann í samtali við Sindra Sindrason í Íslandi í dag. Hann hafnaði fullyrðingum um að ríkisstjórn hefði ekki umboð til að starfa. Hún hefði umboð alveg þangað til að kosið yrði.

Aðspurður sagðist Geir ekki vita til þess að Bjarni Benediktsson ætlaði sér að reyna að ná formannssætinu af sér eftir landsfund. Geir ítrekaði þá skoðun sína að ríkisstjórnin þyrfti að vinna að ýmsum brýnum verkefnum, til dæmis samkomulaginu við Alþjóðagjaldeyrissjóðinn. Vont væri að stefna landinu í stjórnleysi með því að boða til kosninga í vor.

Þá sagði Geir að koma þyrfti í veg fyrir að fólk þyrfti að flytja af heimilum sínum ef það lenti í vandræðum með greiðslur af íbúðarlánum. Unnið væri að ýmsum verkefnum með Íbúðarlánasjóðnum varðandi þetta.

Þá sagði Geir að nauðsynlegt væri að koma fótum undir bankana. Það væri grundvöllurinn að því að fjármálakerfið gæti farið að starfa eðlilega.