Mótmæli og borgarafundur á Akureyri

Boðað hefur verið til mótmælafundar á Ráðhústorginu í dag og er fólk hvatt til að mæta með pott og sleifar sem framkvæmir hávaða svo að ríkisstjórnin vakni.

,,Við mótmælum því að ríkisstjórn Íslands hafi hneppt þjóðina í skuldafangelsi og að hún neiti því að almenningur fái að kjósa," segir í tilkynningu sem send var úr netfangi Hugins Freys Þorsteinssonar, aðstoðarmanns Þuríðar Backman þingmanns Vinstri grænna, en undirrituð er af ,,fólkinu í landinu."

Haldinn verður borgarafundur um menntamál á Deiglunni og hefst sá fundur klukkan 20. ,,Að borgarafundi loknum verður mótmælum haldið áfram á Ráðhústorgi hafi ríkisstjórnin ekki þá þegar sagt af sér og boðað til kosninga," segir í tilkynningunni.