Hæpið að skila láninu frá AGS

Hugmyndir um að skila láninu frá Alþjóðagjaldeyrissjóðnum eru mjög hæpnar, að mati Þorvalds Gylfasonar hagfræðiprófessors við Háskóla Íslands. En þessa hugmynd hafa forystumenn Vinstri grænna viðrað að undanförnu.

„Ef láninu yrði skilað að þá væri gengi krónunnar miklu ótryggara og miklu líklegra til þess að falla um skeið þegar byrjað verður að slaka á gjaldeyrishöftunum," segir Þorvaldur. Hann bendir hins vegar á að ekki hafi komið fram hvers konar breytingar Vinstri grænir leggi til á efnahagsáætlun ríkisstjórnarinnar, sem gerð var í samkomulagi við Alþjóðagjaldeyrissjóðinn. Hann geti því ekkert tjáð sig um þann þátt málsins.

Of takmörkuð efnahagsáætlun

„Ég er þeirrar skoðunar að efnahagsáætlunin sé prýðileg svo langt sem hún nær en stjórnvöld þurfa að skýra hana betur fyrir almenningi og styrkja hana. Efnhagsáæltunin er bara áætlun um lágmarks bjargráð. En menn þurfa að gera miklu meira en það allra minnsta sem þeir komast af með og ríkisstjórnin hefur ekki gert næstum því nóg af því sem gera þarf til viðbótar við áætlunina," segir Þorvaldur.

Þorvaldur segir að ríkisstjórnin þyrfti að taka miklu skýrar á endurskipulagningu bankanna. Enn sem komið sé mjög lítið vitað um starf skilanefndanna og ríkisstjórnin hafi ekki sagt hvað hún ætli fyrir um nýju bankana. „Hún þarf að leggja fram áætlun um það hvað um þá verður og hversu lengi þeir eiga að vera í ríkiseigu og hvað tekur við," segir Þorvaldur. Hann segir að ríkisstjórnin þurfi einnig að búa til umhverfi utan um þann gríðarlega vanda sem sé að steypast yfir gríðarlegan fjölda heimila og fyrirtækja. Ekki hafi enn komið fram hvað ríkisstjórnin sé að hugsa um þau mál.

Forystumenn í stjórnsýslunni og viðskiptalífinu dragi sig í hlé



„Það þarf ekki að vera," segir Þorvaldur þegar hann er spurður um það hvort stjórnarslit og kosningar í vor yrðu til þess að dýpka efnahagsvandann. Þorvaldur segir að skipta þurfi um stjórnendur í Seðlabankanum, Fjármálaeftirlitinu, í sumum ráðuneytanna og í lögreglunni. „Og svo þarf einnig að skipta um fólk í viðskiptalífinu í mjög stórum stíl. En það er auðvitað ekki verkefni handa ríkisstjórninni. Því að meðvirkni viðskiptalífsins í vitfirringunni sem leddi til bankahrunsins var þannig vaxin að það er alveg nauðsynlegt að viðskiptalífið taki sér tak og skipti um fólk í brúnni," segir Þorvaldur.