Mótmælafundur gegn ofbeldi

Boðað hefur verið til mótmæla gegn ofbeldi og eignaspjöllum. Þau munu fara fram á Lækjartorgi næst komandi sunnudag.

Í tilkynningu kemur fram að fundurinn sé tækifæri fyrir alla, sama hvaða stjórnmálaskoðanir þeir hafi til að mótmæla þeim ,,ofbeldisaðferðum sem afmarkaður hópur hefur beitt að undanförnu."

Fundurinn er sagður vettvangur fyrir þá sem vilja hvetja Íslendinga til að sýna stillingu og mótmæla með friðsamlegum hætti.

,,Mikilvægi þess að við búum í friðsamlegu samfélagi, þar sem rödd og penna er beitt í stað hnefa og grjóts, verður ekki vanmetið."

Fundurinn hefst klukkan 15.