Tveir ammoníaklekar í gær

Kalla þurfti til lögreglu og slökkvilið í gærkvöldi vegna ammoníaksleka í Ísverksmiðjunni í Grundarfirði. Tveir menn sem voru að störfum í verksmiðjunni þegar lekans varð vart munu ekki hafa hlotið skaða af. Talið er að lekinn hafi ekki verið mikill. Líklegt þykir að ammoníakinu hafi skolað út á haf en ekki er vitað hvað olli lekanum.

Þetta var annað tilfellið um ammoníaksleka í gær en fyrr um kvöldið kom upp ammoníaksleki í togaranum Frosta sem lá að bryggju á Grenivík. Lögregla og slökkvilið á Grenivík og Akureyri brugðust við útkallinu og þegar komið var á staðinn mátti sjá ammoníaksský leggja frá skipinu og að þorpinu, að því er fram kemur í tilkynningu frá lögreglu.

Þeir sem í skipinu voru komust ómeiddir frá því m.a. með því að nota sérstakar ammoníaksgrímur. Slökkviliðið hófst þegar handa við að úða vatni yfir skipið til að skola niður og „fella" ammoníakið. Félagar úr björgunarsveitinni Ægi á Grenivík gengu í hús til að kanna ástand en ekki reyndist þörf á að rýma hús. Að sögn lögreglu varð óhappið þegar verið var að vinna við kælikerfi skipsins. Ekki er vitað hve mikið ammoníak hafði þá sprautast úr því.