Um 500 mótmælendur fyrir utan Samfylkingarfund

Mótmælendur eru farnir frá Austurvelli og eru nú komnir að Þjóðleikhúskjallaranum þar sem flokksfundur Samfylkingar hefst eftir hálftíma. Lögregla hefur tekið sér stöðu fyrir utan Þjóðleikhúskjallarann.

Þúsundir hafa mótmælt ríkisstjórninni í miðborginni nánast sleitulaust frá því á hádegi í gær. Mótmælendur hafa kveikt elda og barið trumbur. Þeir krefjast þess að ríkisstjórnin segi af sér, og boðað verði til kosninga.

Á milli fjögur- og fimmhundruð mótmælendur eru nú fyrir utan Þjóðleikhúskjallarann þar sem flokksfundur Samfylkingarinnar hefst eftir nokkrar mínútur. Fólkið kyrjar slagorð og lemur potta og pönnur.

Töluvert margir lögreglumenn eru inni í anddyri Þjóðleikhúskjallarans, en engin átök hafa orðið milli þeirra og mótmælenda. Innandyra er salur kjallarans fullur af samfylkingarfólki sem ætlar að sitja fundinn. Þar verður áframhald á ríkisstjórnarsamstarfi við Sjálfstæðisflokkinn meðal annars rætt, en afar skiptar skoðanir eru um ágæti þess innan vébanda Samfylkingarinnar.