Gæsluvarðhaldsúrskurður yfir meintum brennuvargi felldur úr gildi

Hæstiréttur hefur fellt úr gildi gæsluvarðhaldsúrskurð yfir manni sem er grunaður um að hafa orðið valdur að bruna í húsi að Tryggvagötu 10 í síðasta mánuði.

Í úrskurði Hæstaréttar kemur fram að maðurinn hafi játað brot sitt. Virðist mega ráða af málatilbúnaði ákæruvaldsins að krafan sé byggð á því að brot varnaraðila hafi verið til þess fallið að valda almannahættu. Ekki séu efni til að fallast á þetta nema talin sé hætta á að varnaraðili sé líklegur til að brjóta af sér á ný með sambærilegum hætti og hann er sakaður um að hafa gert 14. janúar 2008. Ákæruvaldið hafi ekki leitast við að færa fram rök fyrir því að svo sé og gögn málsins þyki ekki benda til þess. Af þessum ástæðum fellst Hæstiréttur á kröfu mannsins um að fella úrskurðinn úr gildi.