Kona lést í eldsvoðanum á Kljáströnd

Kona á níræðisaldri lést í bruna í sumarbústað á Kljáströnd skammt frá Grenvík í morgun. Slökkviliðinu í Grýtubakkahreppi barst tilkynning um eldinn um hálf níu leytið í morgun. Konan var ásamt eiginmanni sínum inni í bústaðnum þegar eldurinn kom upp en maðurinn var fluttur með brunasár á Fjórðungssjúkrahúsið á Akureyri.

Að sögn Frímanns Kristjánssonar varaslökkviliðsstjóra í Grýtubakkahreppi var kallað eftir aðstoð frá Slökkvilðinu á Akureyri. Þegar þeir komu á staðinn voru menn búnir að ná tökum á eldinum. Nokkuð greiðlega gekk að slökkva eldinn, en það tók ekki nema um fimmtán mínútur að sögn Frímanns.

Um er að ræða gamalt hús sem breytt hefur verið í sumarbústað. Ekki er vitað um eldsupptök að svo stöddu en rannsóknarlögreglan á Akureyri rannsakar málið.