Staðfestir ekki brotthvarf Þorsteins Pálssonar

Ari Edwald, forstjóri 365 miðla, staðfestir ekki að Þorsteinn Pálsson láti af störfum sem ritstjóri Fréttablaðsins á næstu dögum.

Vefmiðillinn Eyjan fullyrðir að Þorsteinn sé að hætta af eigin ósk sem annar af ritstjórum blaðsins og að Jón Kaldal verði einn ritstjóri. Í fréttinni kemur auk þess fram að Hreinn Loftsson, aðaleigandi útgáfufélagsins Birtings, sem meðal annars gefur út DV, Mannlíf og Séð og Heyrt, vilji að fyrirtækið verði sameinað 365 miðlum.

„Þessu er fljótsvarað. Ég tek ekki þátt í ótímabærum umræðum um málefni fyrirtæksins þegar ákvarðanir um einhverskonar breytingar liggja ekki fyrir," segir Ari og bætir við að það eigi bæði við um hugsanlega sameiningu við Birting sem og ritstjórn Fréttablaðsins.

Þorsteinn sem er 62 ára hefur starfað sem einn af tveimur ritstjórum Fréttablaðsins undanfarin þrjú ár.