Hundur réðist að hænum og drap

Stór hundur, sem var með eigendum sínum í orlofshúsabyggðinni í Akurgerði í Ölfusi, réðst að hænsnum á bænum Borgargerði um miðjan dag í gær. Náði hann að drepa eina hænu og skaða hanann á bænum áður en tókst að stöðva hann.

Þetta kemur fram á vefnum sunnlendingur.is. Þar segir að mikið af lömbum sé við nærliggjandi bæi sem hundurinn hefði allt eins getað ráðist að ef hann hefði ekki verið stöðvaður.

Sólmundur Sigurðsson, bóndi í Borgargerði, tók hundaárásinni létt þegar Sunnlendingur.is spjallaði við hann í dag og sagði að ekki yrðu eftirmálar af hans hálfu vegna þessa. „Fólkið sem átti hundinn varð miður sín en málið var leyst innan húss og lögregla ekki kölluð til. Haninn mun vonandi jafna sig og ég fæ nýja hænu frá fólkinu," sagði Sólmundur í samtali við vefinn.

Sólmundur heldur hænur eingöngu til heimanota en sé horft til þess hlutfalls stofnsins sem hundurinn komst í er skaðinn gríðarlegur. „Ég er nú bara með fimm hænur þannig að þessi eina sem drapst samsvarar 20% af bústofninum," segir Sólmundur hlæjandi í samtali við vefinn. „Mestar áhyggjur hef ég af því að fá ekki eggin mín því hinar hænurnar eru auðvitað í sjokki."

Sólmundur þakkar fyrir að tengdadóttir hans var heima við. „Annars hefði hundurinn klárað hænurnar en þegar hún kom að var hann búinn að drepa eina og byrjaður að tæta í sig hanann," segir Sólmundur.

Þó Sólmundur taki málinu af stillingu eru dæmi um að bændur í Ölfusi séu óhressir og einn þeirra sagði í samtali við Sunnlending.is: „Furðulegt að fólk skuli hleypa svona skaðræðisskepnum lausum, þó það sé uppi í sveit."