Verði áminntur fyrir að segja ólykt af Lýsi

Lögmaður Lýsis, Sigurbjörn Magnússon, krefst þess að skipulags- og byggingarfulltrúi Ölfuss dragi ummæli um fyrirtækið til baka eða verði áminntur ella.

Lýsi rekur fiskþurrkunarverksmiðju í Þorlákshöfn. Bæjaryfirvöld í Ölfusi kvarta undan ólykt af starfseminni en neita fyrirtækinu um byggingu þvottaturna sem eiga að draga úr lyktarmengun. Heilbrigðiseftirlit Suðurlands hefur veitt Lýsi átta ára starfsleyfi í Þorlákshöfn.

Bæjarstjórnin lýsir fullum stuðningi við störf skipulagsfulltrúans „við úrlausn þessa vandasama máls,“ eins og segir í bókun vegna kröfu Lýsis.

Ummælin umdeildu lét skipulagsfulltrúinn falla í útvarpsviðtali 17. apríl síðastliðinn. Lýsti hann ólyktinni af fiskþurrkuninni þannig að nánast væri ólíft í Þorlákshöfn. Sagði hann einnig að niðurstaða umhverfisráðuneytisins varðandi starfsleyfi væri ekki í samræmi við skipulag.

Í bréfi lögmanns Lýsis til skipulagsfulltrúans sjálfs segir að dragi hann ekki ummælin til baka áskilji Lýsi sér rétt til að höfða skaðabótamál á hendur honum til að fá ummælin dæmd ómerk og fá hann dæmdan til að greiða skaða- og miskabætur.

„Við erum í viðræðum við bæjarstjórann og aðra fulltrúa Ölfuss um að ná sátt í málinu og ég vil ekki tjá mig um þessi mál á meðan,“ segir lögmaður Lýsis spurður um næstu skref.- gar