Ný Wikileaksskjöl: Indriði vildi fresta Icesave fram yfir kosningar

Indriði H. Þorláksson, þáverandi ráðuneytisstjóri í fjármálaráðuneytinu, skrifaði Mark Flanagan og Franek Rozwadowski, sem fara með mál Alþjóðagjaldeyrissjóðsins á Íslandi, þann 13. apríl og óskaði eftir því að Icesave samningunum yrði frestað. Þetta kemur fram í tölvupóstsamskiptum milli þremenninganna sem hafa verið birt á Wikileaks.

Indriði segir í tölvupóstinum að það sé pólitískt ómögulegt að auka við skuldastöðu ríkissjóðs Íslands fyrir kosningarnar sem fari fram 25. apríl og jafnvel sé það ómögulegt í nokkurn tíma eftir kosningarnar.

Eins og kunnugt er var skrifað undir Icesave samninginn í byrjun júnímánaðar en enn er verið að bíða eftir því að Alþingi staðfesti ríkisábyrgð á samningnum.

Mark Flanagan svarar Indriða og segist gera sér grein fyrir því að Icesave sé viðkvæmt mál. Hins vegar séu Icesave samningarnir grundvallaratriði fyrir endurskoðun efnahagsáætlunar ríkisstjórnarinnar og Alþjóðagjaldeyrissjóðsins.