Meirihluti vill tvöfalda atkvæðagreiðslu um aðild að ESB

Mikill meirihluti þjóðarinnar vill tvöfalda þjóðaratkvæðagreiðslu um Evrópusambandsaðild, líkt og Sjálfstæðisflokkurinn hefur talað fyrir, samkvæmt nýrri könnun Capacent.

Könnunin var gerð fyrir Heimssýn, hreyfingu sem er andvíg aðild að Evrópusambandinu. Spurt var: Hversu miklu eða litlu máli finnst þér skipta að fram fari þjóðaratkvæðagreiðsla um hvort Ísland eigi að sækja um aðild að Evrópusambandinu? Rúm 76% töldu það skipta mjög eða frekar miklu máli að haldin verði þjóðaratkvæðagreiðsla - áður en byrjað verður að semja. Þetta er sú leið tvöfaldrar þjóðaratkvæðagreiðslu sem Sjálfstæðismenn hafa talað fyrir og var það Geir Haarde fyrrverandi formaður flokksins sem viðraði þessa hugmynd um síðustu áramót.

Töluverður munur er á afstöðu kynjanna til málsins samkvæmt könnuninni. Ríflega 67% karlmanna vilja tvöfalda þjóðaratkvæðagreiðslu en það vill lunginn af kvenfólki, eða 85,6%. Langmestur munur er þó á afstöðu fólks eftir fjölskyldutekjum. Tæplega 81% einstaklinga með fjölskyldutekjur innan við 250 þúsund krónur á mánuði vilja tvöfalda þjóðaratkvæðagreiðslu. Þegar fjölskyldan hefur milljón eða meira í mánaðarlaun er hins vegar rétt rúmlega helmingur sem vill þá leiðina. Það eru því samkvæmt könnun Capacent einkum efnameiri fjölskyldur sem vilja fara beint í aðildarviðræður - án þjóðaratkvæðagreiðslu.

Úrtakið var 1264 og svarhlutfall 62,3 prósent.