Segir starfsemi Seðlabankans ganga sinn vanagang

Stefán Jóhann Stefánsson ritstjóri hjá Seðlabankanum segir starfsemi bankans ganga sinn vanagang. Um hundrað mótmælendur haf nú tekið sér stöðu við bílageymslu bankans sem og aðalinngang. Stefán segist ekki geta tjáð sig um það hvort Davíð Oddsson sé mættur til vinnu en mótmælendur vilja Davíð úr Seðlabankanum.

„Við sjáum og heyrum," segir Stefán Jóhann sem staddur er innan veggja bankans.

Að sögn fréttamanns fréttastofu sem staddur er fyrir utan bankann hafa nokkrir starfsmenn bankans þurft frá að hverfa þegar þeir mættu til vinnu í morgun. Segir hann starfsmennina hafa þurft að snúa við þegar þeir sáu mótmælendur sem standa við inngang bílageymslunnar.

„Ég hef nú ekki heyrt af því," segir Stefán Jóhann sem vill ekki svara því hvort einhver seðlabankastjóranna sé mættur til vinnu, né hvort von sé á þeim í dag.