Hefðu betur hlustað á stjórnarandstöðuna í október

Steingrímur J. Sigfússon, formaður Vinstri grænna sagði í ræðu sinni á Alþingi í dag að ríkisstjórnin hefði betur tekið tilboði stjórnarandstöðunnar um þjóðstjórn í október. Hann sagði vert að velta því fyrir sér hvort hlutum væri ekki betur fyrir komið í dag ef því tilboði hefði verið tekið.

Steingrímur sagðist hugsi yfir því hve harkalega stjórnarslitin hefðu farið fram. Hann setti spurningamerki við þau skilaboð sem væri verið að senda út í heim með því að skilja með jafn óvinsamlegum hætti og raunin hafi verið um.

Steingrímur sagði einnig að þó að þjóðstjórnarnafnið hljómi vel dygði það ekki til, slík stjórn yrði að vera fær um að taka til hendinni. Hann sagðist jafnframt hafa ákveðnar efasemdir um að það geti gengið eftir.

Vinstri grænir eru þrátt fyrir það tilbúin til að axla ábyrgð og enginn kostur er útilokaður í því sambandi, sagði Steingrímur en bætti við að tíminn sé hins vegar dýrmætur. Óvissunni verði að eyða og mynda starfhæfa stjórn sem geti stýrt málum uns þjóðinni gefst kostur á því að velja nýja ríkisstjórn.

„Það er ekkert minna sem okkar bíður en að endurmóta þetta samfélag úr þeim rústum sem ríkisstjórnir síðustu ára hafa kallað yfir okkur," sagði Steingrímur.