Viðskiptaráðherra án aðstoðarmanns og upplýsingafulltrúa

Gylfi Magnússon viðskiptaráðherra starfar þessa dagana án aðstoðarmanns og upplýsingafulltrúa. Helga Valfells var aðstoðarmaður hans fyrir kosningar og Þorfinnur Ómarsson upplýsingafulltrúi en þau hafa bæði horfið á braut.

„Þegar ég varð ráðherra í febrúar þá réð ég Helgu sem aðstoðarmann út apríl í ljósi þess að kjósa átti í lok apríl. Þorfinnur var ráðinn tímabundið af forvera mínum sl. haust og vann sömuleiðis út apríl. Ég vildi í hvorugu tilfellinu skuldbinda ráðuneytið lengur en út apríl enda vissi ég ekki hvort ég yrði ráðherra eftir þann tíma," segir Gylfi.

Hann segir að ekki hafi unnist tími í að ráða í störf þeirra Helgu og Þorfinns eftir stjórnarmyndun.