Charlize Theron í aðalhlutverki á HM-drættinum

Suður-afríska leikkonan og Óskarsverðlaunahafinn Charlize Theron verður í aðalhlutverki í Höfðaborg á föstudaginn þegar dregið verður í riðla í úrslitakeppni HM í Suður-Afríku sem fer fram næsta sumar.

Theron verður annar kynnir hátíðarinnar en hinn veður Jerome Valcke, aðalritari FIFA. Hátíðin mun taka einn og hálfan tíma og verða send út til 200 landa. Það er búist við að meira en 200 milljónir munu fylgjast með en mesta spennan verður örugglega í þeim 32 löndum sem eiga lið í keppninni.

Gospel og jasstónlist verður áberandi meðal skemmtiatriðanna en heimamenn munu leggja áherslu á tónlist frá Suður-Afríku.

Fullt af heimsþekktum mönnum munu taka þátt í hátíðinni en þar á meðal eru eþíópíski langhlauparinn Haile Gebrselassie, David Beckham, suður-afríski fótboltamaðurinn Matthew Booth, Krikketmaðurinn Makhaya Ntini og svo fyrirliði rúgbý-liðs Suður-Afríku, John Smit.

Meðal gesta í salnum verða síðan Jacob Zuma, forseti Suður-Afríku og nóbelsverðlaunahafarnir Frederik de Klerk og erkibiskupinn Desmond Tutu.