Starfsmanni á meðferðarheimili sagt upp störfum - sætir rannsókn á kynferðisbroti

Starfsmaður á meðferðarheimli fyrir unglinga á Norðurlandi sem kærður var fyrir kynferðislegt ofbeldi gegn þremur stúlkum hefur verið sagt upp störfum. Þetta staðfestir Bragi Guðbrandsson forstjóri Barnaverndarstofu í samtali við fréttastofu en rannsókn á málinu er ekki lokið. Maðurinn er grunaður um að hafa brotið gegn stúlkunum sem voru á umræddu meðferðarheimili en maðurinn er á fertugsaldri.

Vísir fjallaði um málið í mars en þá hafði borist kæra frá stúlku sem var á heimilinu en sami maður laut rannsókn vegna svipaðra brota fyrir rúmu ári síðan. Þá var honum vikið frá tímabundið. Í því máli voru tvö börn vitni að umræddum brotum en framburður þeirra stangaðist á auk þess sem maðurinn neitaði allan tímann. Rannsókn lögreglu lauk og kæran var feldl niður. Þá var maðurinn fluttur til í starfi og hóf að vinna á meðferðarheimli fyrri drengi þar til því var lokað en þá sneri hann aftur á gamla vinnustaðinn.

Í fréttum Sjónvarpsins í kvöld var sagt frá málinu en þar kom fram að nokkrum dögum eftir kæru stúlkunnar hafi komið fram önnur kæra. Þar var á ferðinni stúlkan sem áður hafði neitað að hafa verið beitt ofbeldi. Kæra stúlkunnar sem fyrst kærði manninn var þá tekin upp að nýju. Lögreglan rannsakar því þrjú mál gegn manninum.

Bragi segir í samtali við fréttastofu að nokkuð sé síðan manninum var sagt upp störfum. „Sú ákvörðun var tekin af rekstraraðila heimilisins og var óháð því hvort ákært yrði í málinu eða ekki. Í þessu tilviki vorum við sammála rekstraraðila um að best væri að ekki yrði um framhald á störfum hans að ræða. Það snýst ekki um sekt eða sakleysi mannsins heldur var gert til þess að skapa frið um starfsemina," segir Bragi.

Ákæra hefur ekki verið gefin út í málinu en rannsókn er enn í gangi.