Tekist á um veru Guðlaugs á fundum borgarráðs

Meirihluti Sjálfstæðisflokks og Framsóknarflokks vilja breyta samþykkt um stjórn Reykjavíkurborgar og fundarsköp borgarstjórnar á þá vegu að kjörgengir varamenn í borgarráði séu þeir sem skipa sæti á framboðslista við seinustu borgarstjórnarkosningar. Í dag geta einungis borgarfulltrúar og varaborgarfulltrúar setið fundi borgarráðs.

Varamaður Óskars er ekki varaborgarfulltrúi

Upphaf málsins má rekja til meirihlutaskiptanna í ágúst á seinasta ári þegar Framsóknarflokkurinn myndaði á nýjan leik meirihluta með Sjálfstæðisflokknum. Marsibil J. Sæmundsdóttir, fyrsti varaborgarfulltrúi Framsóknarflokksins, styður ekki núverandi meirihluta. Guðlaugur G. Sverrisson var kjörinn varamaður Óskars Bergssonar, oddvita Framsóknarflokksins, í borgarráði. Guðlaugur skipaði 14. sæti flokksins í seinustu borgarstjórnarskosningum og telst því ekki til varaborgarfulltrúa.

Tekist var á um málið í borgarráði í byrjun september 2008 og var málinu vísað til forsætisnefndar. Málið kom fyrst í dag á nýjan leik inná borð borgarráðs. Meirihlutinn lagði til á fundinum að þeir sem skipa sæti á framboðslista við síðustu kosningar geti setið fundi ráðsins.

Án fordæmis

„Í þessu máli er ekki deilt um kjörgengi varamanna til varamennsku í borgarráði heldur hvort að hver sem er af framboðslista flokka sé kjörgengur til varamennsku í borgarráði. Meginregla sveitarstjórnarlaga er að aðalmenn í sveitarstjórn skuli einungis kjörgengir sem aðalmenn og því eru engin fordæmi um það frá nokkru sveitarfélagi á Íslandi að aðrir en fyrstu varamenn viðkomandi lista séu kjörnir sem varamenn í bæjarráðum," segir í sameiginlegri bókun Samfylkingar og Vinstri grænna.

Þar segir jafnframt að ákvæði sveitastjórnarlaga og laga um kosningar til sveitarstjórna séu ekki óskýr og að þau hafi aldrei verið túlkuð á þann veg sem meirihlutinn leggi nú til.

Samgönguráðuneytið úrskurðar um réttmæti

Í framhaldinu lögðu borgaráðsfulltrúar Sjálfstæðisflokks og Framsóknarflokks fram bókun. „Með tillögu meirihlutans er verið að eyða þeim vafa sem óumdeilanlega er uppi um kjörgengisskilyrði varamanna í borgarráði."

Meirihlutinn segir að tillagan muni fá hefðbundna meðferð í borgarstjórn og í framhaldi af afgreiðslu borgarstjórnar muni tillagan fara til samgönguráðuneytisins til staðfestingar, en málefni sveitastjórna heyra undir ráðuneyti samgöngumála.