Innbrot í miðborginni

Tvö innbrot í fyrirtæki í miðborginni voru tilkynnt til lögreglunnar í gær, eftir því sem fram kemur í frétt frá lögreglunni. Á öðrum staðnum braut þjófurinn rúðu til að geta teygt sig í afgreiðslukassann en sá hafði ekki ýkja mikið upp úr krafsinu. Á hinum staðnum saknaði eigandinn einkum drykkjarvara en þjófurinn hafði bæði gos og áfengi á brott með sér. Þá var tveimur tölvum, auk ýmissa annara muna, stolið úr íbúðarhúsi í borginni en lögreglu tókst að endurheimta flesta hlutina fljótt og vel og koma þeim aftur í réttar hendur. Þá var Ipod stolið úr bíl í vesturbænum og í Hafnarfirði var geislaspilari tekinn úr bíl í bænum.

Þá segir lögreglan að talsvert sé um að vörum sé stolið úr verslunum þessar vikurnar. Nokkur hnuplmál komu til kasta lögreglunnar í gær en í Smáralind voru þjófar staðnir að verki í þrígang. Í Kringlunni var líka þjófur gripinn glóðvolgur en fólk virðist girnast varning af ýmsu tagi. Í gær voru það einkum snyrtivörur sem freistuðu þjófanna. Þá var handtösku stolið frá konu sem var að störfum í húsi við Laugaveg. Í töskunni voru m.a greiðslukort hennar, ökuskírteini og sími. Þjófarnir, sem komu við sögu hjá lögreglu í þessum málum, eru á ýmsum aldri og af báðum kynjum.