Bjarga sér á líkkistum

Það kom reyndar ekki til af góðu að smiðirnir Stefán Matthíasson og Sveinn Reynisson skelltu sér í líkkistubransann. Þeir höfðu rekið verktakafyrirtækið Norðanmenn í þrjú ár og voru með fimmtán manns í vinnu við húsbyggingar og innréttingar, þegar allt hrundi, og þeir neyddust til að segja flestum upp. Þá datt þeim í hug að hefja líkkistusmíði á verkstæði í Grindavík.

Þeir segja að milli 70 og 80 prósent af líkkistum séu innfluttar og vonast til að allir velji núna frekar íslenskt. Fyrsta kistan var tilbúin á mánudag og seldist samdægurs og nú eru fjórar seldar. Þeir smíða einnig krossa og duftker. Lágt gengi krónunar gerir samkeppnisstöðu þeirra sterka og þeir eru farnir að hugsa enn stærra; um útflutning. Verið sé að skoða fyrir þá markaði bæði í Kanada og Þýskalandi og þeir telji sig samkeppnisfæra þar, miðað við núverandi gengi.